Wakil Gubernur Bali Mungkah Parikrama Utsawa Dharmagita Provinsi Bali Kaping XXX Warsa 2022
Denpasar-Kacihnayang antuk nyuarayang gong, Wakil Gubernur Bali Prof. Tjokorda Oka Artha Ardana Sukawati mungkah parikrama Utsawa Dharmagita Provinsi Bali kaping XXX warsa 2022, sané magenah ring Gedung Ksirarnawa Taman Budaya Denpasar, Soma Umanis wuku Bala, 12 September 2022.
Ring sambrama wacana dané, Wakil Gubernur Bali sané akrab kasapa Cok Ace ngaturang apresiasi antuk parikrama Utsawa Dharmagita ring semengé kadi mangkin sané kamargiang luring utawi langsung riantukan sampun kalih warsa kamargiang daring utawi online. Parikrama puniki kamargiang nyabran warsa mabuat pisan kawentenan ipun pinaka cihna upaya iraga sareng sami ngawerdiyang adat miwah budaya Bali, pamekas ring parikrama Utsawa Dharmagita puniki madaging tattwa agama miwah sastra sané sampun wénten turmaning kaplajahin turun tumurun. Parikramané puniki taler satinut sareng Visi Pemerintah Provinsi Bali Nangun Sat Kerthi Loka Bali melalui Pembangunan Semesta Berencana Menuju Bali Era Baru.
Wagub Bali ngawewehin panglimbak Bali sané mangkin gelis pisan, puniki prasida ngawetuang sayan rered tradisi budayané sangkaning punika mabuat pisan nincapang malih ajaran agama miwah sastrané pinaka warisan saking leluhur puniki kamargiang. Sangkaning punika, Wagub Cok Ace mapangapti majeng ring pamilet Utsawa Dharmagita mangdané galahé sané mangkin anggén ngaraketang tur nincapang pangweruhan malarapan antuk gagitan miwah mapawuruk pamekas ring para yowana nguncarang sloka miwah mantra sané kaanggén ring upacara Yadnya.
Guru Besar ISI Denpasar puniki taler ngamptiang mangdane pamargi Utsawa Dharmagita prasida pinaka tuntunan iraga sareng sami rikalaning ngulati kahuripan sané tentrem, santi miwah sukerta. Parikramané puniki taler kaaptiang prasida anggén kakili majeng ring para yowanané mangdané urati tur oneng ring sastra Bali miwah resep saha masareng sareng nyaga budaya sané adiluhung puniki.
Kepala Dinas Kebudayaan Provinsi Bali I Gede Arya Sugiartha ring sambrama wacanan dané maosang ring Utsawa Dharmagita Provinsi Bali XXX warsa 2022 sané ngunggahang patitis ” Danu Kerthi: Sastragama Tirtha” matetujon luiré mangda ngalestariang Dharmagita, nincapang rasa para yowana Bali madharmagita saha nuntun mangdané oneng tur resep ring daging sastra sané kaunggahang malarapan antuk Dharmagita. Utsawa Dharmagita XXX warsa 2022 kamargiang tigang rahina ngawit tanggal 12 kantos 14 September 2022 kakawitin antuk pamungkahan kamargiang antuk puja gita miwah Taman Penasar sané ngambil patitis NGRAKSA DANU, NGRAKSA KASUKERTAN KAHURIPAN”, taler kalanturang antuk wimbakara minakadi ngawacén kakawin, ngawacén sloka, ngawacén geguritan miwah macepat saha kidung.
Acara Utsawa Dharmagita kamiletin oleh pamilet sané pinaka duta saking Kabupaten/Kota se Bali minakadi Kabupaten Jembrana, Kabupaten Tabanan, Kabupaten Badung, Kota Denpasar, Kabupaten Gianyar miwah Kabupaten Karangasem. Tigang Kabupatén sané nénten nyarengin Utsawa warsané sané mangkin inggih punika Kabupaten Klungkung, Kabupaten Bangli, miwah Kabupaten Buleleng.
Pamukah Utsawa Dharmagita XXX taler karauhin olih Ratu Shri Bhagawan Putra Nata Nawa Wangsa Pemayun, Kepala OPD ring wewidangan Pemprov Bali, Kepala Dinas Kebudayaan Kabupaten/Kota se Bali, jajaran Forkopimda Provinsi Bali, sané kakawitin antuk parade pamilet Utsawa Dharmagita sanking Kabupaten/Kota se Bali.
