Dudonan Acara Bulan Bahasa Bali Saniscara (Sabtu), 6 Pebruari 2021
Om Swastiastu?
Sampunang lali rahinane mangkin nonton sesolahan seni sastra saking Sanggar Seni Maha Widya Natya sane mamurdha “Lingga Acala” hari ini Sabtu, 6 Februari 2021 jam 19.00 WITA.
Reringkesan Carita:
Purwakala ring Jawa Dwipa ketug lindu lan genjong kawenténan jagaté tan surud. Sané ngawinang wantah nénten wénten Giri Mandara pinaka pencer panyegjeg jagat. Indiké punika ngawinang Ida Betara Mahakarana nitahang para Dewa, Resing Langit, Suranggana, Widyadara, Gandara mangda sida nuju Jambu Dwipa ngamét Giri Mahameru mangda kagenahang ring Jawa Dwipa. Tetujonnyané nénten lian mangda degdeg jagat Jawa Dwipané. Kala punika para dewatané makadi Ida Betara Wisnu nyuti rupa dados nagaraja tur ngelilit bangkiang gunungé, saha mincerang gununge punika. Ida Betara Brahma manados Kurmagni nyunggi kawéntenan gunungé.
Kalaning muter Giri Mahaméru punika, tan pajamuga dres tanpa bayu para Déwané sami, raris nayub toya sane medal saking gunungé. Toya punika mawasta Kalakuta sané marupa wisya ngawinang para déwatané lebar. Eling ring kawéentenan punika, raris Ida Betara Parameswara digelis tedun ka jagaté saha nayub Kalakuta punika. Indiké puniki sané ngawinang Ida maparab Betara Nila Kanta. Sangkaning kasidian yogan Ida Betara Parameswarané, Ida prasida nyupat tirta Kalakuta punika manados Tirta Amertha Siwamba.
Sumber : @bulanbahasabali2021
